Улаанбаатар, 2023 оны арваннэгдүгээр сарын 8 /МОНЦАМЭ/. Нэгэн  бодол хаанаас ч юм төрдөг. Монгол хүн холын газарт суухдаа нутгийнхаа бүхий л зураглал, дурсамжийг сэтгэл дотроо “тэмтэрдэг” болов уу. Өглөөний нар дээшилж, хурц гэрэл тусах бүрт “ай даа, нутгийн намар шиг сайхан өдөр байна аа” хэмээн мэндчилж яваа хүмүүс бол Япон улсын Кансай бүс нутагт оршин суугаа монголчууд.

Тэд “Намрын баяр-Осака 2023” баярын  зочид, төлөөлөгч юм. Осака хотод ес дэх удаагаа  зохион байгуулж буй уг намрын баяр өмнө нь Ниши дүүргийн “Үцүбо” цэцэрлэгт хүрээлэнд болдог байжээ. Харин энэ удаа буйр сэлгэж “ Цүрүми Рёкүчи” цэцэрлэгт хүрээлэнд анх удаа зохион байгуулж буй нь энэ юм.

Баярын талбайг нар зөв тойруулан хатгасан өнгө ижил цэнхэр асрууд, төрийнхөө далбааг төв асраа голлуулан хүндэтгэж залсан нь наадмын талбайг санагдуулах ажээ. Монгол соёл, уламжлалт зан заншлыг Япон улсад сурталчлан таниулах зорилготой энэхүү баярт тус улсад оршин суугаа, амьдарч буй монголчууд өнцөг булан бүрээс хүрэлцэн ирдгээс гадна япон иргэд ч  олноор оролцдог байна.

Энэ удаагийн “Намрын баяр-Осака 2023”-ыг Монгол Улсаас Япон улсын Осака хотод суугаа Ерөнхий консул А.Энх-Амгалан нээв. Тэрбээр “Монгол Улсын Засгийн газраас 2023-2025 оныг “Монголд зочлох жил болгон зарласан билээ. Өнгөрсөн найман жилийн хугацаанд “Намрын баяр” маань  үүргээ бүрэн дүүрэн биелүүлж, баруун Японы олон нийтэд монгол үндэсний ёс зан заншил, соёл урлаг болон уламжлалт спортыг таниулан сурталчлахын зэрэгцээ орчин үеийн Монгол Улсын хөгжил цэцэглэлтийн талаар боломжийн хэмжээнд ойлголтыг гүнзгийрүүлж ирсэн билээ. Мөн Монгол, Японы харилцаа, хамтын ажиллагаа “Энхтайван, хөгжил цэцэглэлтийн төлөөх тусгай стратегийн түншлэл”-ийн түвшинд жилээс жилд гүнзгийрүүлэн хөгжиж байна. Энэхүү харилцааны чухал үндэс суурь нь хоёр улсын ард иргэдийн харилцан ойлголцол, найрамдал нөхөрлөл бөгөөд үүнд “ Намрын баяр” наадам үнэтэй хувь нэмэр оруулж буйг тэмдэглэн хэлмээр байна. Бидний оршин сууж буй Кансай бүс нутагт тун удахгүй “Осака-Кансай Экспо- 2025” дэлхийн үзэсгэлэн зохион байгуулагдана. Уг үзэсгэлэнд Монгол Улс оролцох шийдвэр гаргаж бэлтгэл ажлаа хийж эхлүүлээд байна. Шинэ технологи, шинэлэг санаачилгаар дүүрэн “Осака- Кансай экспо 2025” дэлхийн үзэсгэлэнг амжилттай зохион байгуулагдана гэдэгт итгэлтэй байна гэсэн” юм.

Энэ удаагийн намрын баярт Япон улсын Засгийн газрын төлөөлөгч, Кансай бүс дэх Элчин сайд Химэно Цүтомү гэргийн хамт, мэргэжлийн сүмогийн 70 дахь аварга Харүмафүжи Д.Бямбадорж  нар болон бусад орны зочид хүрэлцэн ирсэн юм. Намрын баярын хөтөлбөрт “Зээргэнтийн шил” уртын дууг Японы дуучин Ито Майко дуулж, үзэгчдээс өндөр үнэлгээ авсан бол манай уран бүтээлчдээс уламжлалт урлагийн “Их татлага”, “Сүхийн цагаан морь” хамтлаг, Соёлын тэргүүний ажилтан бүжигчин Г.Бурмаа, дуучин Б.Дэмбэрэлсундуй, Ч.Бямбасайхан, С.Ариунзаяа, Өвөрмонголын хөгжимчин н.Алтаншагай нар оролцож уран бүтээлээсээ өргөн барилаа. Мөн баярт оролцогчдод зориулж  анх удаа хонжворт  сугалаа зохион байгуулсан.  Сугалааны супер хонжвор  МИАТ  “Кансай- Нарита” чиглэлийн хоёр талын нислэгийн тийз байсан нь  “хэн нутаг руугаа аз сугалж явах вэ” гэсэн халуун дотно хүлээлтийг хамтад нь дагуулж байлаа. Баярын хөтөлбөрт үндэсний бөхийн барилдаан багтаж, түрүүлсэн бөхийн бай шагналыг Харүмафүжи Д.Бямбадорж гардуулсан нь бөхчүүдийн урам зоригийг улам нэмсэн билээ.

Жил бүрийн намрын баярыг зохион байгуулахад Осака дахь Ерөнхий консулын газар, Кансай дахь Монголчуудын холбооныхон ихээхэн идэвхтэй оролцдог бөгөөд энэ удаагийн намрын баяр зохион байгуулалт сайтай, иргэдийн оролцоо жигд байсан  нь ажиглагдаж байв. Мөн Япон улсын өөр хотод оршин суугаа монгол иргэд нутгийнхаа идээ ундааг бэлтгэж, үндэсний үйлдвэрлэлээ сурталчлан таниулж байсан нь хэдийнэ тогтсон уламжлал болсныг илтгэх аж. Асарт бэлтгэгдсэн үндэсний үйлдвэрлэлийн бүтээгдэхүүнүүд арлын японд хэдийнэ “нутагшиж” япончуудын хэрэглэх дуртай амттан, хайдаг хүнс болсон нь үндэсний брэндийн үнэ цэн юм. Үндэсний брэнд нь  үнэт өв соёлоо бүтээдгийн жишгээр  баруун Японд “Монголын нэг өдөр” ийнхүү суурьшин өнжив .

 Осака хот. Сэтгүүлч В.Сарантуяа