Цас, цочир хүйтрэл эрт эхэлж магадгүй

Цаг уур, орчны шинжилгээний газраас энэ намрын цаг агаарын урьдчилсан төлвийг гаргалаа. Есдүгээр болон арваннэгдүгээр сард зүүн бүсийн аймгуудаар хур тунадас ихсэж, агаарын температур олон жилийн дунджаас сэрүүн байх төлөвтэй байна.

Иймд нойтон цас, цочир хүйтрэл ердийнхөөс эрт эхлэх магадлалтай гэж мэргэжлийн байгууллага үзжээ. Ард иргэд, аж ахуйн нэгжүүдийг өвлийн бэлтгэл ажлаа эртнээс базаахыг зөвлөж байна.

Есдүгээр сар. Баян-Өлгий, Увс, Завхан, Хөвсгөл, Архангай, Булган зэрэг баруун, хойд нутгаар дунджаас дулаан байна. Харин Дорноговь, Дорнод, Сүхбаатар, Өмнөговийн зүүн хэсгээр дунджаас хүйтэн байх төлөвтэй. Хур тунадас баруун нутгаар бага, зүүн нутгаар ахиу орно.

Аравдугаар сар. Улс даяар ерөнхийдөө дунджаас дулаан байх төлөвтэй. Хэнтий, Дорнод, Сүхбаатар, Сэлэнгэ, Төв аймгийн зүүн хэсгээр дунджийн орчим байна.

Арваннэгдүгээр сар. Сэлэнгэ, Төв, Хэнтий, Дорнод, Сүхбаатар зэрэг зүүн, хойд нутгаар дунджаас хүйтэн, хур тунадас ахиу байх төлөвтэй. Баруун нутгаар харин дулаан, хуурай байна.

Малчид, айл өрхүүд өвөлжөөний бэлтгэл, өвс тэжээлийн нөөц, галлагааны асуудалдаа энэ сарын дотор анхаарахыг зөвлөж байна.

Эх сурвалж: Цаг уур, орчны шинжилгээний газар