АНУ-ын засаг захиргаа Трампын хөрөгтэй $250-ын шинэ дэвсгэрт хэвлэхээр төлөвлөжээ

АНУ-ын Сангийн яам Трамп ерөнхийлөгчийн хөрөгтэй $250-ын шинэ дэвсгэрт хэвлэхээр төлөвлөж байгаа талаар The New York Times мэдээллээ.

Уг төлөвлөгөөг Трампын талын албан тушаалтан Сангийн яаманд уламжлан, макет загварыг бэлдүүлжээ. Дэвсгэрт дээр Трампын зураг, гарын үсэг байршуулах бөгөөд энэ нь АНУ-ын түүхэнд амьд хүнээс анх удаа мөнгөн тэмдэгт дээр хөрөг нь гарч буй тохиолдол болох юм. Өмнө нь ерөнхийлөгчид зөвхөн нас барсны дараа л мөнгөн дэвсгэрт дээр хөрөг нь гардаг уламжлалтай байсан.

Сангийн яамны хэвлэлийн газрын дарга Брэндон Бич болон түүний туслах Майк Браун нар ажилчдад энэ төлөвлөгөөг шуурхай хэрэгжүүлэхийг удаа дараа шаарджээ. Гэвч ажилтнууд хууль зүйн асуудал, уламжлал зөрчигдөж буйг анхааруулж, эсэргүүцэл илэрхийлсэн байна.

Трамп өмнө нь өөрийнх нь хөрөг мөнгөн дэвсгэрт дээр гарах ёстой гэж ярьж байсан бөгөөд $2-ын дэвсгэрт дээр өөрийнх нь зураг тавихыг хүсч байсан ч, уг төлөвлөгөө хэрэгжээгүй юм.